Rooh Se Rooh Ka Milan – Part 4 Pyaar Ya Pichle Janam Ka Farz?

Rooh Se Rooh Ka Milan – Part 4

Pyaar Ya Pichle Janam Ka Farz?

Arjun ka dimaag ab bhi Vihaan ki baaton mein uljha hua tha. Kya yeh sach ho sakta hai? Kya pichle janam ka rishta waqai hota hai? Ya Vihaan sirf koi kahani bana raha hai?

Usne phone ka wallpaper fir dekha—ek maharaja aur ek sainik. Woh maharaja Arjun ki tarah dikhta tha, aur sainik… woh Vihaan tha!

"Yeh kahani kya hai, Vihaan?" Arjun ne ghusse se poocha.

Vihaan thoda samay tak chup raha, fir uski awaaz ek ajeeb dukh se bhar gayi. "Yeh ek kahani hai jo adhuri reh gayi thi… hamare pichle janam ki kahani."

Arjun ab irrite hone laga. "Bas karo yeh sab! Pichle janam ki baatein ek soch hai, koi sach nahi!"

Vihaan ek kadam aage bada aur uski aankhon mein dekha. "Toh fir yeh batao, pehli baar milne ke bawajood tumhe lagta hai jaise tum mujhe jaante ho?"

Arjun ne kuch kehna chaha, lekin shabdon ne saath nahi diya. Haqeeqat yeh thi ki jab se usne Vihaan ko dekha tha, tab se uska dil ajeeb tareeke se dhadak raha tha. Jaise koi puraani yaadein dimag ke kisi kone mein chipi ho, jo dheere-dheere ubhar rahi ho.

Vihaan ne ek gehri saans li aur kahani shuru ki.

"Sadiyon pehle, tum ek maharaja the, aur main tumhara sainik. Tumhare rajya ka sabse vafadar sainik, jo tumhari hifazat ke liye apni jaan bhi de sakta tha. Par yeh sirf ek farz ka rishta nahi tha, yeh ek pyaar ka rishta tha... jo duniya ke samne kabhi aa nahi sakta tha."

Arjun ab Vihaan ki aankhon mein kho sa gaya tha. Vihaan aage bolta raha,

"Ek din, hamari mohabbat ka raaz kisi ne dekh liya. Hamari dosti ek samrajya ke liye ek khatra ban gayi thi. Tumhari praja tum par ungli uthane lagi thi, aur tum ek maharaja hokar pyaar ka apmaan nahi jhel sakte the. Tumne ek faisla liya—mujhe rajya se nikalne ka."

Arjun ne Vihaan ki aankhon mein dekha. Wahan sirf pyaar tha, lekin saath hi ek gehri udaasi bhi.

"Par main sirf tumhara sainik nahi tha, Arjun... main tumhari rooh ka hissa tha. Tumne mujhe bhagaya, par main laut aaya. Tumse ek akhri mulaqat karne. Tum mujhe rok sakte the, lekin tumne nahi roka. Tumne mujhe apni talwar se maar diya, sirf isliye kyunki tumhe yeh sabit karna tha ki tum maharaja ho, kamzor aashiq nahi."

Arjun ke haath se phone gir gaya. Uska dil zor-zor se dhadak raha tha. Yeh sab sunne ke baad, use pata nahi chal raha tha ki yeh sirf ek kahani hai ya sach.

"Aur ab, sadiyon baad, hum phir mile hain. Ek naye janam mein. Tum maharaja nahi ho, main sainik nahi hoon, par hamari rooh ab bhi ek doosre ko pehchanti hai."

Arjun ke saamne sab kuch ghoomne laga. Yeh sirf ek ittefaq tha? Ya sach mein unki rooh ek dusre ko pichle janam se jaanti thi?

Lekin agar yeh kahani sach thi, toh ek aur sawal tha—kya iss janam mein unka pyaar poora hoga? Ya phir phir se yeh kahani adhuri reh jaayegi?

(Part 5 – The Final Chapter coming soon... Kya Arjun aur Vihaan ka pyaar iss janam mein mukammal hoga? Ya phir ek baar phir taqdeer unhe alag kar degi? Stay tuned!)